قازىرگى ورنىڭىز:اڭگىمە » تولىق مازمۇن

جاپوندىق جۇرەك (اڭگىمە)

قوسىلعان ۋاقىت:2016-12-12رەداكتور:مۋساقاينارى:اي-كۋا سايتىكورىلىمى:ىزدەلۋدە...



قاراعايدىڭ بۇتالارىندا ءبىر-بىرىمەن جارىسا سەكىرگەن تيىندەرگە ۇنتاقتالعان جاڭعاقتار شاشىپ، ولاردىڭ تالاسا-تارماسا جۇگىرگەندەرىن قىزىقتاعان اجار، ەركەلەي جىمىڭداعان جۇلدىزدار كەشكى اسپاندا جامىراپ شىقسا دا ساياباقتىڭ تۇكپىرىندەگى ورىندىقتا تاپجىلماستان وتىر. كايدزيرو. كىتاپتاردا جازىپ، كينودا كورسەتىلگەندەي ءبىر كورگەننەن كوڭىلى قۇلاي كەتكەن جوق. ءجاي، قىزمەتتەستەردىڭ اراسىنداعى سىيلاستىق قانا. اجار سوعان سەنىمدى ەدى. سەزىمىن العاشقىدا ۇيالا بىلدىرگەن كايدزيرو عانا ولاي ويلاماعان سياقتى. دەنە ءبىتىمىنىڭ نازىكتىگىنە قاراماستان، تاباندى جىگىت بولىپ شىقتى. ۇزىن بويلى، يىعىمەن كوك اسپاندى تىرەمەسە دە بويشاڭ، جاۋىرىنى قاقپاقتاي، ەر تۇلعالى، قاسى-كوزى قيىلعان حانزادانى اڭساپ، قيالداپ جۇرگەندە جۇقالتاڭ ءوڭدى، جۇقالتاڭ دەنەلى جىگىتتى قالايشا ۇناتىپ قالعانىن دا بىلمەيدى. ىزەتتىلىگى مە، بىلىمدىلىگى مە، بولماسا مادەنيەتتىلىگى مە، ايتەۋىر بىرتىندەپ وزىنە تارتا بەردى. ونى ءبىر كۇن كورمەسە، داۋىسىن ءبىر كۇن ەستىمەسە، تابيعاتىنان سابىرلى اجاردى تانۋ مۇمكىن بولماي قالادى. وسىنشالىقتى سەزىمگە بەرىلگىشپىن دەپ بۇرىن-سوڭدى ويلاپ كورمەپتى. كايدزيرو. ءتىلى بۇراتىلا بەرگەسىن، قازاقشالاپ ونى كەنجە دەپ العان. ات ارىتىپ جەتە المايتىن، قيان تۇكپىردەگى تەڭىزدىڭ شەتىنەن كەلگەن جىگىت. سىپايىلىعىن ۇناتتى ما، الدە جۇرەك قىلىن تابا ءبىلدى مە، ول جاعىن قىزدىڭ جۇرەگى تۇسىنبەي-اق قويدى. كونە قورعانداردى زەرتتەۋمەن اينالىساتىن جاننىڭ وسىندا كەلگەنىنە ءۇش جىل. قىز-جىگىت بولىپ، ءبىر-بىرىنە سەزىمدەرىن ءبىلدىرىپ جۇرگەندەرىنە دە ءۇش جىلداي بولىپتى. جىگىت دەيدى-اۋ، وردا بۇزار جاستان بەس-التى شاقىرىم اسىپ كەتكەن ازامات. وزدەرى ارالاس-قۇرالاس قۇربى-دوستارىنىڭ اراسىندا سىڭىسە باستاعان داستۇرگە ساي، كەشە جۇرەگىن ۇسىنىپ، ومىرلىك جارى بولۋىن وتىنگەن. اجار باستاپقىدا قۋانىشتان ءبىر ورىندا تۇراقتاماي، كايدزيرو-كەنجەنى شوپىلدەتىپ سۇيە بەرگەن. بۇعان سالسا، بۇگىن-اق نەكە سارايىنا بارىپ، ادەمى، نازىك ساۋساقتارىنا نەكە جۇزىگىن سالۋعا بار. ءبىراق... جاۋىندى كۇنى توبەسى جابىلماي قالعان ءۇيدىڭ قابىرعاسىنان اققان تامشىلارداي، قۋانىشىنىڭ ءسات سايىن سەلدىرەي بەرەتىنىن سەزبەگەن دە، بىلمەگەن دە ەدى. وعان سەبەپ، كەنجە ەكەۋىنىڭ اراسىندا بولعان اڭگىمە. قانشا دەگەنمەن جاسى وتىزدارعا كەلىپ قالعان بويجەتكەن، قانشا جەردەن ۇستامدى بولامىن دەگەنىمەن، ءبىر ءبۇتىن بولامىز عوي دەگەن وي قامشىلادى ما، بالا جەتەكتەگەن، سابيلەرىمەن شۇيىركەلەسكەن قۇربىلارىنا قاراپ، ءتۇن بالاسى ارمانداپ، قيالعا بەرىلىپ كەتەتىنى سەبەپ بولدى ما، ۇيلەنۋ تۋرالى كەنجەنىڭ ءسوز سالۋىن اتاپ وتكەن كەشتە «ءبىر قىزىمىز، ءبىر ۇلىمىز بولادى، ءيا» دەپ قويىپ قالعانى. بۇندايدى بولاشاق كۇيەۋ كۇتپەگەن سياقتى، جۇقالتاڭ ءوڭى قىزاراقتاپ، ساسقالاقتاپ قالدى. «جۇگەندى كەنجەنىڭ وزىنە بەرمەي، قىز باسىممەن قويىپ قالعانىم ىڭعايسىزداۋ بولدى-اۋ» دەپ ويلاپ تا ۇلگەرگەن. جالدامالى پاتەرگە جەتكەنشە ەكەۋى دە ۇنسىزدىكتە بولدى. - ونى، ەندى، كەيىنگە قالدىرساق،- پاتەرگە جەتىسىمەن بار ايتقانى وسى بولدى بولاشاق كۇيەۋدىڭ. اجار تاڭىرقاي قاراعان. نەسىنە كەيىنگە قالدىرادى، الدە، بوتەن ەلدەمىن دەپ، ءوزىن سەنىمسىزدەۋ سەزىنگەنى مە؟ ەلىنە قايتار ۋاقىتى دا تاياپ قالدى، وزىمەن بىرگە ەرتە كەتپەكشى ەدى عوي اجارىن. اجاردىڭ كوكتەمنىڭ العاشقى كۇنىندەي جارقىراپ تۇرعان كوڭىل-كۇيىنىڭ ءبىر ساتتە قوڭىرقاي تارتقانىن كورىپ، كايدزيرو-كەنجە سۇيىكتىسىنىڭ بۇل قىلىعىن تۇسىنبەدى. جۇمساق كۇلىمسىرەپ، اجاردىڭ بەتىنەن ءوپتى. كايدزيرو-كەنجەدەن قىشقىل شاراپتىڭ ءيىسى سەزىلەدى. - بالا دەگەن ول- ۇلكەن جاۋاپكەرشىلىك،-دەپ باستادى ءسوزىن. اجار باسىن شۇلعىدى. - ماتەريالدىق جاۋاپكەرشىلىك. ونى ءوسىرىپ-جەتكىزۋگە، وقىتۋعا قانشا قارجى كەتەتىنىن ەسەپتەپ كوردىڭ بە؟ اجار باسىن شايقادى. - وعان وتە كوپ قارجى كەتەدى. وتە كوپ. وسى جاسقا دەيىن جيعان-تەرگەننىڭ ءتۇبى كورىنىپ قالۋى دا مۇمكىن. اجار تاڭىرقاي قارادى. تۇسىنبەدى. - ۇيلەنگەننەن كەيىن ءبىزدىڭ ەلگە بارىپ تۇرامىز دەپ شەشىپ ەدىك قوي. اجار باسىن يزەدى. - ءوزىڭ بىلەسىڭ، بىزدە جۇمىس سەندەردەگى سياقتى ەمەس، ۇزاققا سوزىلادى، ابدەن قاراڭعى تۇسكەنشە. ءتىپتى، جۇمىستا تۇنەۋگە دە تۋرا كەلەتىن كەزدەر بولادى. - ولاي جۇمىس ىستەۋدىڭ نە قاجەتى بار؟ – اجار تاڭدانىسىن جاسىرعىسى كەلگەنىمەن، بەت-الپەتىنەن ءبىلىنىپ-اق تۇر. - كوپ جۇمىس-كوپ اقشا. اقشاڭ كوپ بولسا، سىيلى-قۇرمەتتىسىڭ. - جۇمىستى جاقسى كورەسىز بە؟ ەندى كايدزيرو-كەنجە تاڭىرقاي قارادى سۇيىكتىسىنە. جۇمىستى قالايشا جاقسى كورمەۋگە بولادى؟ - كوپ جۇمىس-كوپ اقشانىڭ كەپىلى. - اقشانى سونشالىقتى جاقسى كورەسىز بە؟ كايدزيرو-كەنجە كۇلىمسىرەدى. - ءتىپتى، بالادان دا ارتىق جاقسى كورەسىز بە؟ - ول جاعىن ويلاپ كورمەپپىن. ءوزىن تۇسىنەتىن، شىنايى جاقسى كورەتىن جانعا تۇرمىسقا شىعىپ، انا بولسام دەپ، ۇزاق جىلدار بويى ارمانداپ كەلگەن اجاردىڭ جۇرەگىن بىرەۋ اياۋسىز جانشىپ جاتقانداي، سىزداپ كەتتى. - اقشانى ءوز ومىرىڭىزدەن دە ارتىق جاقسى كورەسىز بە؟ كايدزيرو-كەنجە كۇلىمسىرەپ، اجاردىڭ قۋارىپ كەتكەن بەت-الپەتىن كورىپ، باسىن يزەدى. - كەنجە، ءتىپتى، سول ءۇشىن بالادان دا باس تارتپاقسىز با؟ ال اقشا ءسىزدى جاقسى كورە مە؟ -ول جانسىز دۇنيە عوي، ول مەنى قالاي جاقسى كورۋى مۇمكىن؟ - ەندەشە، جىلۋى جوق، سەزىمى جوق جانسىز دۇنيەنى نەگە جاقسى كورەسىز؟ - ول كوپتەگەن ماتەريالدىق يگىلىكتەر اكەلەدى، ونى ءوزىڭ دە بىلەسىڭ. - كەنجە، سوندا ءسىز اقشا ءۇشىن ءومىر سۇرەسىز بە؟ ونسىز دا بەلگىلى نارسەگە اجاردىڭ سونشاما قادالىپ قالعانىنا كايدزيرو-كەنجە قايران قالدى. - ال سەن شە؟ سەن نە ءۇشىن ءومىر سۇرەسىڭ؟ -ۇرپاق ءوربىتۋ ءۇشىن. ءسىز ايتقان سول ماتەريالدىق يگىلىكتەردى بالالاردى ومىرگە اكەلىپ، ءوسىرىپ-جەتكىزۋگە، وقۋىنا، ۇيلەنۋىنە جۇمساۋعا بولماي ما؟ ۇيلەنۋ دەمەكشى، قارىزعا توي وتكىزەتىن جىگىتكە بىردە-ءبىر جاپون قىزىنىڭ تۇرمىسقا شىقپاسى بەسەنەدەن بەلگىلى ءجايت. وسىندا جۇرگەلى كايدزيرو-كەنجەنىڭ ءبىر ۇققانى، مىنا جاقتىڭ جۇرتى قايتارىمى نەشەمە جىلعا سوزىلاتىن قارىز الىپ، توي وتكىزگەندى ماقتان تۇتاتىنى، ءتىپتى، ءوزارا باسەكەلەستىك تە بار سىڭايلى. ءوز ۇعىمىنا تاعى ءبىر قايشى كەلەتىن تۇسى، الپامساداي ەركەكتىڭ ەكى قولىن بوس قويىپ، جۇمىسسىز ەربيىپ جاتۋى. ونى بىلتىر سۇيىكتى اجارى اپكە-جەزدەسىمەن تانىستىرعاندا كورگەن. جۇمىسسىز ەركەك – سۇيكىمسىز ەركەك. بىردە-ءبىر جاپوندىق ايەل جۇمىسسىز ەرىنە ءبىر جىلدان ارتىق شىدامايدى. «قوش بول، كوكەم كورگەنشە» دەپ، ىرگەسىن بىردەن اۋلاق سالادى. ال، اجاردىڭ اپكەسىنىڭ جەتى جىل بويىنا تىربانىپ، تابىس تاۋىپ، جۇمىسسىز ساندالىپ جاتقان ەرىن اسىراپ-باعىپ وتىرعانى كايدزيرو ءۇشىن جۇمباق كۇيىندە قالدى. ەكى قىزىن ۇزاتقان ەكەن، راحاتتانىپ ءومىر ءسۇرۋدىڭ ورنىنا ماسىل كۇيەۋدى نەمەنەسىنە اسىراپ وتىر دەپ قايران قالعانى بار. كايدزيرو-كەنجە اجاردىڭ يىعىنان قۇشاقتاپ وزىنە تارتتى. ءبىر ساتتە مۇڭ تورلاي قالعان كوزدەرىنەن ءوپتى. - اجار، سەن مەنى تۇسىنەتىن شىعار دەپ ۇمىتتەنىپ ەدىم. - بىلەسىز بە، بىزدە بار بايلىقتى ۇرپاقتىڭ يگىلىگى ءۇشىن جيىپ-تەرەدى. ءبىزدىڭ ەلدە، ۇرپاقسىز جاندى قۋارعان اعاشپەن تەڭەيدى. - ءوزىمىز ءۇشىن، ءوز قىزىعىمىز ءۇشىن ءومىر سۇرسەك تە ەشتەڭەدەن قۇر قالمايمىز عوي. كايدزيرو-كەنجە ءبىر ءسات ءۇنسىز قالدى. الىستا، تىم قاشىقتا قالعان ەلىندەگى ارىپتەستەرىنىڭ اراسىندا ۇيلەنىپ، وتباسىلى بولعاندارى دا بارشىلىق. ءبىراق، بالالى بولۋعا اسىققاندارى نەكەن-ساياق. اجارى، كورىكتى دە سۇيكىمدى سۇيىكتىسى بۇنى ءبىر ايتقاننان، ءسال عانا ەمەۋرىننەن تۇسىنەتىن ەدى، بۇنى جان-دۇنيەسىمەن جاقسى كورەتىنىنە سەنىمدى ەدى. قاجىپ-تالىپ، كۇنى-ءتۇنى كومپيۋتەرگە تەسىلىپ، شارشاعان ميىن سابالاپ، ەل قاتارلى ءومىر سۇرسەم دەپ تىرنەكتەپ جيىپ، بار تاپقان-تايانعانىن قيالىنداعى ۇرپاقتارعا قالايشا شاشۋعا بولادى؟ اجارىنىڭ نەگە ءوزىن تۇسىنبەيتىنىن، تۇسىنگىسى كەلمەيتىنىنە ءبىر ءسات قاپالانىپ تا قالدى.. ومىرلىك سەرىگىم بولار، يىق ارتار ازاماتىم دەپ بۇكىل تاعدىرىن، جان-جۇرەگىن ۋىسىنا ۇستاتاتىن جاننىڭ نەلىكتەن بۇلاي ۇساقتالعانىن اجار تۇسىنبەدى. كايدزيرو-كەنجە اس بولمەسىنە بارىپ، توڭازىتقىشتا تۇرعان جارتى شولمەك شاراپ پەن ەكى بوكال اكەپ، قىزىل شاراپتى سىزدىقتاتا قۇيىپ، بوكالدىڭ ءبىرىن اجارعا ۇسىندى. - كەنجە، - اجاردىڭ داۋىسى تىم مۇڭدى شىقتى.- ءسىزدىڭ ەلگە بارماي، ءبىزدىڭ ەلدە قالا بەرەيىكشى. كايدزيرو-كەنجە اجاردى تانىپ-بىلگەن كەزىنەن بەرى ءدال وسىنشالىقتى مۇڭايعانىن كورمەگەن ەدى. داۋىسى دا قاشاندا اشىق-جارقىن شىعاتىن. ال، قازىر... - بۇل ەلدە بىزدەگى سياقتى مول قارجى تابۋ مۇمكىن ەمەستىگىن ءوزىڭ دە بىلەسىڭ عوي. - مەنىڭ بالا سۇيگىم كەلەدى. اجاردىڭ جاۋدىرەي قاراعان كوزدەرى جاسقا تولدى. داۋىسى دا دىرىلدەپ كەتكەن. - بالكىم، بۇل جەردە اسا بايىپ كەتپەسپىز، ءبىراق باقىتتى عۇمىر كەشەتىنىمىز انىق. بايلىق بولماعان جەردە قالاي باقىتتى بولماقشى، بۇل كايدزيرو-كەنجەنىڭ ساناسىنا جەتپەدى. بالاسى جوق، قابىرعالارى قاڭىراپ تۇرعان ۇيدە قالاي باقىتتى بولماق، بۇنى اجاردىڭ ساناسى قابىلداي المادى. جاپوندىق جۇرەك اجارعا، قازاق قىزىنا، سۇيىكتىسىنە دەگەن ىستىق سەزىمىنىڭ سەرپىلگەنىنە ەلىتىپ، ءتاتتى ءلازاتتىڭ تۇڭعيىق تىلسىمىنا بويلاي ەنىپ، قۇلاشىن سەرمەي قالىقتاي ءجۇزىپ، ماحابباتتىڭ جۇپار اۋاسىن قۇشىرلانا جۇتىپ، جۇرەك تۇكپىرىنە ادامي ساۋلە ءتۇسىپ، وزىنە بۇيىرعان وسىناۋ باقتان باسى اينالعانىمەن، كاپيتاليستىك ساناسى جۇرەگىم ۇرپاعىم دەپ سوعاتىن، سول ۇرپاعى ءۇشىن جيناعان مالىن شاشاتىن قىر ەلىنىڭ تانىم-تۇسىنىگىن قابىلداي المادى. كايدزيرو-كەنجە كۇرسىنىپ، بوكالداعى شاراپتان ءۇنسىز ءىشتى. اجاردىڭ ادەمى بويالعان كىرپىكتەرىنەن تامعان ءمولدىر تامشىلار بەتىن ايعىزداپ، وڭىرىنە تامىپ جاتتى.
 باقىت بايتىبايەۆا
«قامشى» سىلتەيدى


0
评论ىزدەلۋدە......
جوبا تۋرالى | اي - كۋا ۋيچات تەكشەسى | بايلانىس ورناتۋ | قولداۋشىلار | وقىرمان نازارىنا | ەرەجە - تۇزىم | لەبىز |

توراپتىڭ بارلىق ۇقىعى اي - كۋا تورابىنا ءتان.جاۋاپتى رەداكتور:مۋسا ءتابىتاي ۇلى(ءمانسۇر)

copyright 2017 苏ICP备15062819号-3 18792514428 Mr.Musa