قازىرگى ورنىڭىز:ءسوز ونەرى » تولىق مازمۇن

ولگەندەر قايتىپ كەلەمە؟ (ەستەلىك-ەسسە)

قوسىلعان ۋاقىت:2016-12-13رەداكتور:مۋساقاينارى:اي-كۋا سايتىكورىلىمى:ىزدەلۋدە...



بۇل مەنىڭ ومىرىمدە بولعان وقيعالاردان ۇزىندىلەر
ادام جانە جەر اتتارى دا وزگەرتىلمەدى.
                                      -اۆتور

- ولگەندەر قايتىپ كەلەمە؟
- مەنشە، قايتىپ كەلەدى...
مەن ول كەزدە تىم جاس، وتپەلى،  ءولى ارا شاقتا تۇرعان كەزىم ەدى. ءبىراز ۋاقىتتان بەرى قاتتى ناۋقاستانىپ جۇرگەن اكەم سوڭعى كەزدەرى مۇلدە ناشارلاپ، ءبىر جۇتىم سۋ، ءبىر ءتۇيىر ءدان جۇتاالماي، قارا تۇياعىنان ابدەن حال كەتتى. اكەمنىڭ ءتىرى ەكەندىگىن توسەگىنىڭ اياق جاعىندا وتىرىپ، ونىڭ قالاقتاي عانا اياعىن سيپاپ وتىرعان مەن تەك، قىزىلاسىعىنىڭ استىنداعى باياۋ سوعىپ تۇرعان تامىرىنان عانا سەزىپ وتىراتىنمىن. ال باس جاعىندا مولدا الدە اۋزى دۋالى قارتتار عانا وتىراتىن. اكەمدى كەزەكپەن قاراۋىلدايتىن ادامدار دا كوپ ەدى. ءبىرى كەتسە، ءبىرى كەلىپ ءبىزدى جالعىز تاستامايتىن ەدى. اينالايىن حالقىمنىڭ، اعايىننىڭ قادىرى وسىنداي دا عوي. ءبىر كۇنى اكەم اياق استىنان كوزىن اشىپ، قاسىندا وتىرعان ادامعا بولار-بولماس داۋىسپەن انامدى جانە ۇلكەن اعامدى شاقىرۋىن ايتىپتى. شەشەم بايقۇس ءبىراز جىل اۋىرۋ ادام قاراپ ابدەن تيتىقتاپ شارشاپ جۇرگەن ەدى، ۇيپاسى شىققان شاشىن جاۋلىعىنىڭ استىنا باستىرا سالىپ، اكەم جاتقان بولمەگە كىرىپ كەتتى، سوڭىنان اعام كىردى. سوندا، اناممەن باقۇلداسىپ بولعان سوڭ، اعامنىڭ قولىن الىپ، بەس ساۋساعىن بۇگىپ، ءوزىنىڭ ءالسىز قولدارىمەن قىسىپتى. شاماسى، اعايىندى بەسەۋ ەدىڭدەر، ەندى ءىنى-قارىنداستارىڭا ءوزىڭ باس-كوز بول، ىنتىماق-بىرلىكتەرىڭدى ەشقاشان جازباڭدار دەگەنى بولار. سونى ءبىلدىرىپ اياۋلى اكەم ماڭگىلىك ساپارعا اتتانىپ كەتتى. ءبىز جىلادىق، جىلاي ءجۇرىپ اكەمىزدى قارا جەردىڭ قوينىنا بەردىك، اكەمىزدىڭ اياۋلى دەنەسىن تابىتتان شىعارىپ جاناقىمعا سالاردا كور جيەگىندە جۇرەلەپ وتىرعان ۇلكەن اعامنىڭ كوزىنەن سورعالاعان جاستى كورىپ ءبىر ءسات وعان قاراپ قالىپتىم. مەن ومىرىمدە كۇنى بۇگىنگە دەيىن ءدال سونداي جىلاعان جاندى كورگەم ەمەسپىن. ونىڭ كوزىنەن اققان جاستى “سورعالادى” -دەۋدەن گورى“سەلدەدى”-دەۋىم ءجون شىعار، كوزىنەن شىققان جاس ءجۇزىن جۋىپ، سودان بارىپ جەرگە تامىپ جاتقان جوق، كوزىنەن ءبىر بۇلاق اشىلعانداي كىرپىكتەرىنىڭ اراسىنان توگەلگەن جاس تامشىلارى سونشاما تەز جىلدامدىقپەن بىرىنەن سوڭ ءبىرى ىركىلىسسىز توپىراققا بىردەن قۇيىلىپ جاتتى.....
اكەمىزدىڭ قازاسى بارىنەن بۇرىن انام مەن اعاما قاتتى باتتى. ماعان دا جەڭىل ءتيدى دەپ ايتا المايمىن. بوزبالا شاق ءسىرا سونداي شىنايى قايعىرىپ، شىنايى قۋانا دا بىلمەيتىن، نەنىڭ قىمبات، نەنىڭ ارزان ەكەنىن ايىرا دا المايتىن  “ەسالاڭ”بىر كۇي كەشەتىن ساتتەر-اۋ شاماسى. ەندى ويلاسام پۇشايمان بولام، نە كەرەك ۋاقىت كەرى ورالمايدى عوي.
اكەم كۇزدىڭ ورتاسىندا قارا سۋىق تۇسەردەن بۇرىن دۇنيە سالدى. ەل -جۇرتىنا وتە سيلى ادام ەدى. قىتايدىڭ التاي دەگەن جەرىندە 1929 جىلى ومىرگە كەلگەن ەكەن. اكەسى قۇيعانباي اسا داۋلەتتى ادام بولعان، ەرتىس وزەنىنىڭ بويىندا اتامنىڭ اتىمەن اتالاتىن وتكەل بار، ول جەردەن اتامنىڭ ءىرى قاراسى مەن جىلقىسى وتەدى ەكەن. اتامىز وتە قاتال جانە ەڭبەكقور جان بولىپتى، تاعى ءبىر ەرەكشەلىگى اۋزى دۋالى ادام بولعان ەكەن، قارعىسى قاپى كەتپەيتىن اتامىزدىڭ ءوزىنىڭ ۇلكەن ۇلى مەزگىلسىز قايتىس بولعاندا، ايتتىىرىپ قويعان كەلىنىنە تەرىس باتا بەرىپ جاس قىزدىڭ ومىردەن قوشتاسۋىنا سەبەپ بولعانى ءوز الدىنا ءبىر دۇنيە. ونى مەن "تەرىس باتا"-دەگەن اڭگىمەم دە تولىق باياندادىم. اتامىز دۇنيە سالاردا اجەمىزگە (اجەم التاي بەتىنە تانىمال باقسى بولعان ادام، ول كىسىنىڭ باقسىلىعى مەن قارتايعان شاعىندا اجەمنەن الىستاماق بولعان جىنىنىڭ بالاسىنا كوشپەك بولعانداعى تۋىنداعىن ادام نانعىسىز وقيعالارىن  "باقسى" دەگەن اڭگىمەمدە جازدىم) مەنەن قالىپ بارا جاتقان بۇل بالا - ۇل بالا بولادى، اتىن مەنەن قالعان  ءبىر تامشى قان سارقىتى بولسىن دەپ سارقىتقان قويىپ كەتىپتى. اكەم مارقۇم ءوز اكەسىنىڭ ديدارىن كورمەگەن ەدى، سودان بولار شەشەسىن كوپ ايتاتىن دى. قىتايدا 1940 جىلداردىڭ باسىندا باستالعان ۇلت ازاتتىق توڭكەرىسكە 15 جاسىندا قاتىسقان اكەم، 21 جاسىندا اۋدان اكىمىنە دەيىن كوتەرىلىپ، ءومىر بويى ءار دارەجەلى قىزمەت اتقارىپ كەلدى. حالقىنا ادال قىزمەت ەتتى، ەر ەڭبەگىن ەلى دە باعالادى.
اكەم قايتىس بولعان سوڭ، زيراتىنىڭ قورعانىن جيناۋ ءىسى اۋا رايىنىڭ قولايسىزدىعىنا جانە قۇرىلىس ماتەريالدارىنىڭ كەشۋىلدەپ قالۋىنا بايلانىستى دەر كەزىندە قولعا الىنباي قالادى. اكەمنىڭ قابىرى قالاشىقتىڭ وڭتۇستىگىندەگى تاۋ بەتكەيىنە ورنالاسقان زيراتتىقتىڭ تاۋ جاعىندا بولاتىن. ورىستەن قايتقان ازدى-كوپتى مالدىڭ ءبىرازى سول تاۋعا ورىستەپ جايىلىپ قايتاتىن. شەشەم ءبىر كۇنى قابىر باسىنان اسا كوڭىلسىز ورالدى. ءبىز سەبەبىن سۇراعانىمىزدا ول كىسى:
- اكەلەرىڭنىڭ  قابىر توپىراعىن مال تاپتاپ كەتىپتى-دەدى. سودان اس تا ىشپەي جاتىپ قالدى. ەرتەسى تاڭ دا تۇرىپ، بىزگە تۇندە كورگەن ءتۇسىن ايتتى: (ول كەزدە انامنىڭ تۇسىنە اكەم جيى كىرەتىن ەدى، قانداي ىسكە تاپ بولسا دا سوعان بايلانىستى اقىلىن ايتىپ، ايان بەرەتىن).
-   ەمحانانىڭ ءبىر بولمەسى سياقتى، تورگە قويىلعان توسەكتە مارقۇم اكەلەرىڭ جاتىر ەكەن، ماعان قاراپ: ءسال ەزۋ تارتقانداي بولىپ، سەن نەسىنە ۋايىمداپ ءجۇرسىڭ، جەت قات جەر استىندا جاتقان ماعان قايداعى مالدىڭ تۇياعى جەتەر دەيسىڭ، ەگەر قورشاۋ كەرەك دەسەڭ مىنە وسى اياداي  جەردى عانا قورشاي سال-دەپ قولىمەن توسەكتىڭ اينالاسىن كورسەتتى-دەپ انام ءسوزىن دوعاردى.  كەيىن ۇلكەندەۋ ەتىپ قورعان تۇرعىزدىق.
اكەم ومىردەن وزاردا مەن 9 سىنىپتا وقيتىن ەدىم. اكەمنىڭ قازاسىنان كەيىن، وت باسىنا كومەكتەسەيىن دەگەن ويمەن،  مەكتەپتەن قول ءۇزدىم دە، ءوزىمنىڭ تۋىپ وسكەن تالدى كومىر كەنىنىڭ شاحتەرى بولىپ بىراق شىقتىم. قاۋىپ-قاتەرى مول شاحتادا جۇمىس ىستەپ جۇرگەنىمدە، ءبىر دە اياعىمدى جارالاپ العانىم بار. سول ءتۇنى تۇسىمە اكەم ەنىپ:
-    بالام-اۋ نەگە ابايلاپ جۇرمەيسىڭ، بۇدان سوڭ وزىڭە ساق بول -دەپ اياعىمدى سيپاپ كەتكەنى. ەرتەسى ويانسام اياعىم كادىمگىدەي ءتاۋىر بولىپ قالىپتى.
ءبىر كۇنى تاڭعى استا وتىر ەدىك، انامىز ءسوز باستاپ، تۇسىندە تاعى اكەمىزدى كورگەنىن ايتتى. ءبىز ءۇشىن ول كەزدە انامىزدىڭ كورەتىن تۇسىنەن ارتىق قىزىقتى دا، ماڭىزدى دۇنيە جوق ەدى. ويتكەنى، ول كىسىنىڭ ءار ءتۇسى ءبىزدىڭ وت باسىمىزعا بايلانىستى اكەم تاراپىنان كەلەتىن حابار سياقتى بولاتىن. اسىرەسە، تاڭعا تاياۋ كورگەن تۇستەرى وتە انىق ءارى ومىردە قاتەسىز كەلەتىن ەدى. سوندىقتان انام: تۇسىمدە اكەلەرىڭدى كوردىم دەسە بولعانى، بەينە انامىز اكەم جۇرگەن جەرگە بارىپ، اياۋلى اكەمىزبەن سىرلاسىپ كەلگەندەي، اكەم جاقتان الدە ءبىر حابار كۇتىپ ەلەگىزىپ، الدىمىزداعى اس-سۋىمىزدى دا ۇمىتىپ، ءبارىمىز بىردەي انامىزعا اڭتارىلىپ قارايتىن ەدىك. سوندا انام ءسوزىن ساباقتاپ:
- ءدال وسىنداي جازدىڭ جايدارى تاڭى ەكەن، كەنەت ۇيگە سۇڭعاق بويلى، ۇزىن شاپاندى، دوڭگەلەك قىرما ساقالدى ءبىر ەر ادام كىرىپ كەلدى. قايىرشى دەيىن دەسەم وعان كەلىڭكىرەمەيدى، مولداعا دا ۇقسامايدى، ءسۇيتىپ تۇرعانىمدا مىنا جاقتان اكەلەرىڭ شىقتى دا: مىنا كىسىگە نان جانە مەنىڭ كيىمدەرىمنەن بەر، رازى ەتىپ قايتار-دەدى. سودان مەن اكەلەرىڭنىڭ ايتۋى بويىنشا الگى كىسىگە ءبارىن بۋىپ-ءتۇيىپ بەردىم-دەدى انام ءتۇسىن ءتامامداپ. انام ايتىپ اۋىز جيعانى سول ەدى، ەسىك الدىنا جاڭا عانا انام سۋرەتتەگەن ادام پايدا بولا كەتپەسى بار ما? انام تاڭدانعانى سونشا:
-مىنە وسى كىسى، وسى كىسى -دەپ الدە نەشە قايتالادى. بەيتانىس جولاۋشى ۇيگە سالەم بەرىپ كىردى. ول جايعاسىپ وتىرعان سوڭ ءوزىنىڭ اللانىڭ قالاۋىمەن وسى ىقشام اۋداندا ءبىر نەشە ۇيگە عانا باس سۇققانىن جانە اكەمنىڭ ارۋاعىنا ارناپ قۇران وقۋعا كەلگەنىن ايتتى. قۇران وقىلىپ داستارحان  جينالعان سوڭ، بەيتانىس ادام اناما قاراپ وتىرىپ، ءاربىر بالاسىنىڭ مىنەز-قۇلقىن قولمەن قويعانداي ايتىپ شىقتى دا، انامنىڭ قاسىندا وتىرعان ءبىر جاسار نەمەرە قىزىنىڭ باسىنان سيپاپ، نەمەرەڭىز باقىتتى بولادى، ەرتەڭ جاقسىلىقتى وسى سابيدەن كورەسىز دەپ باتاسىن جاساپ بەتىن سيپادى. انام مەن جەڭگەم ەكەۋى ول كىسىگە اكەم ايان ەتكەننەن دە مول ەتىپ كيىم-كەشەك پەن تاماق جانە اقشا بەرىپ، جولاۋشىنى رازى ەتىپ اتتاندىردى. بەيتانىس جاننىڭ ايتقانى كەلىپ، سول نەمەرە قىزى مەديتسينا ۋنيۆەرسيتەتىنىڭ اسپيرانتۋراسىن ۇزدىك ءبىتىرىپ، قازىر قۇلجا قالاسىنداعى دوستىق ەمحاناسىندا بەدەلدى دە، بىلىكتى دارىگەر، اجەسىنىڭ "جەكەمەنشىك ۆراچى". انامىز نەمەرەسىنىڭ ارقاسىندا قالاعان ۋاقىتتا بولىمگە جاتىپ، جاقسى ەم-دومىن قابىلداپ ءجۇر. دارىگەرلەر مەن مەدبيكەلەردىڭ دە سيلاستىعى وزگەشە، ءبارى دە سول نەمەرە قىزىنىڭ ارقاسى. نەمەرە كۇيەۋ بالاسى دا مىڭ بولعىر، ساباز دا، جومارت جۇرەكتى جان. اجەسىنىڭ ءۇيىنىڭ رەمونتى،  تۇرمىستىق تەحنيكاسى سونىڭ موينىندا. اجە ءۇشىن بۇدان ارتىق قانداي باقىت بولماق.
شاحتادا جۇمىس ىستەۋ ماعان وڭايعا سوقپادى. جانىم قينالدى. بالا كۇنىمنەن بىلىمگە قۇشتار ەدىم، جالعاستى وقىماي قالعانىمدى وزىمە ءمىن ساناپ ءجۇردىم. اكەم مارقۇم دا مەنىڭ كىتاپ قۇمار ەكەنىمدى ءبىلىپ دۇكەندەگى كىتاپتىڭ ءبارىن ماعان الىپ بەرەتىن. مەنىڭ بولاشاعىمدى بىلىممەن بايلانىستىرىپ مەنەن ءۇمىت كۇتەتىن ەدى. سودان بولار ءبىر جىلدان سوڭ مەكتەپكە قايتا باردىم. بارا سالا ءوز قاتارلاستارىممەن بىرگە 10 سىنىپتى وقيتىنىمدى ايتتىم. مەكتەپ ديرەكتورىنان باستاپ مۇعالىمدەرىمە دەيىن بارلىعى مەنىڭ 9 سىنىپتى نە ءبارى ءبىر جارىم اي وقىعانىمدى العا تارتىپ، قايتادان 9 سىنىپتى وقۋىمدى ۇيعاردى، ال مەن بولسام العان بەتىمنەن قايتار ەمەسپىن، ءسۇيتىپ تارتىسىپ ءجۇرىپ مەن اقىرى 10 سىنىپقا قايتا قابىلداندىم. ول كەزدە ورتا مەكتەپ 10 جىلدىق بولاتىن. تۇلەكتەردىڭ مەملەكەتتىك ەمتيحانىن تاپسىرىپ ۇيگە ورالىپ، سوڭعى ناتيجەمدى كۇتىپ جۇرگەنىمدە ەستە قالارلىق ءتۇس كوردىم. زيراتتىقتىڭ ار جاعىنداعى تاۋدىڭ ۇستىندە سىنىپتاس دوستارىممەن بىرگە ءجۇر ەكەنمىن، كەنەت الدە كىمدەر بىزگە قاراتا وق اتتى، مەنىڭ قاسىمداعى ءبىر نەشە جولداسىم ارعى بەتتەگى سايعا قاراي قۇلدىراي جونەلدى، مەن جانە ەكى بالا قىراتتى بويلاي قاشا بەردىك، كەنەت ءبىر وق مەنىڭ جانىمداعى جىگىتكە ءتيىپ ول سول جەردە قۇلاپ قالدى، ال مەن قاشىپ كەلەم، الدە كىم اكەڭە قاراي جۇگىر دەگەندەي بولدى. مەن بىردەن اكەمنىڭ قابىرىنە قاراي قاشتىم، الدىمنان كوپ ادام كۇتىپ تۇر ەكەن مەنى ءۇستى اشىق ماشيناعا سالىپ الىپ قالىڭ قازاق مەكەندەيتىن ءبىر قالاعا الىپ كەلدى. مۇندا دا ادام سونداي كوپ، ءبارى دە مەنى ءان سالىپ، كۇي شەرتىپ سالتاناتتى تۇردە قارسى الدى. وسى ءتۇسىمدى اناما ايتقانىمدا، ول كىسى:
- بالام بولاشاعىڭ جاقسى بولادى ەكەن، حالقىڭا قادىرلى ازامات بولاسىڭ-دەپ مەنىڭ مەرەيىمدى ءوسىرىپ تاستادى. مەن انامنىڭ ايتقانىنداي كوپ وتپەي شىنجاڭ ۋنيۆەرسيتەتىنە  گراتقا وقۋعا ءتۇستىم. تۇسىمدە مەنىمەن بىرگە ءجۇرىپ وق اتىلعاندا سايعا ءتۇسىپ كەتكەن بالالار ۋنيۆەرسيتەتكە تۇسە المادى، ال وق تيگەن بالا سول جىلى كۇزدە ارمياعا قابىلدانىپ، كوپ وتپەي بايقاۋسىزدا اتىلعان وقتان قازا تاپتى.
ءوز باسىم بالا كۇنىمنەن اجەم مەن انامنىڭ بەرگەن تاربيەسى بولار، ءار ءتۇنى اللاعا سيىنىپ جاتىپ، جۇما كۇندەرى مەشىتكە بارىپ نامازعا قاتىسىپ جۇرەتىن ەدىم. شەشەم ءدىن وقۋىن جاقسى وقىعان كىسى ءارى تابيعاتىنان زەرەك جان ەدى، ونىڭ ۇستىنە انام قىتاي قازاقتارىنا كەڭىنەن تانىس شەجىرەشى جانە ەل بيلەگەن تۇلعا قىلىشباي قاجىنىڭ جيەنى بولاتىن. جاس كۇنىندە وقىعان قۇران سۇرەلەرى مەن قيسا داستاندارى وتە كوپ ەدى. مەن "التاي اياسىندا", "قۇرالاي سۇلۋ" جانە ء"الي باتىر" ت.ب. داستانداردى ەڭ العاش انامنان ەستىدىم جانە انامنىڭ كومەگىمەن "قۇرالاي سۇلۋ" داستانىن قاعازعا ءتۇسىرىپ، جاتتاپ الدىم. سودان بولار اكەم وتكەن سوڭ ءوزىم قۇران باعىشتاپ ءجۇردىم. كەيىن ۋنيۆەرسيتەتتە وقىپ جۇرگەندە مۇمكىندىكتىڭ بولماۋىنان جانە ورتانىڭ اسەرىنەن قۇران وقىپ باعىشتاۋىم ازايىپ كەتتى. سونداي كۇندەردىڭ بىرىندە اعام ماعان ءوزىنىڭ تۇسىنە اكەم كىرىپ:
- قاستەرگە ايت، بۇرىن ماعان سۋسىن بەرىپ تۇرۋشى ەدى، كوپ بولدى سۋسىن اكەلمەدى، شولدەدىم-دەپتى. مۇنى ەستىگەن مەن قامىعىپ قۇران وقىماعان كۇندەرىم ءۇشىن قاتتى وكىندىم.
قازاقستان ەگەمەندىگىن العان دا شەتەلدەگى قازاقتاردىڭ قۋانىشى اتا مەكەندەگى قازاقتاردان ارتىق بولماسا كەم بولمادى. جولىن تاپقاندار قازاقستانعا كەلىپ-كەتىپ تۇردى. مەنىڭ دە جۇرەگىم تۋلاپ، قانىم ويناپ ەلگە كەلۋدىڭ جولىن قاراستىرىپ جۇرگەن كەزىمدە تاعى دا ءتۇس كوردىم. تۇسىمدە ۇلكەن اعام قالاشىقتىڭ باتىسىنداعى تاۋدى نۇسقاپ:
- انە قاراشى، اناۋ اسۋ-اسۋ تاۋلار مەن  كەزەڭدەر سەن بارام دەپ جۇرگەن قازاقستان، وعان بارۋ دا، وندا جۇرۋدە وڭاي ەمەس-دەدى. سول ءسات ۇيدەن شىققان اكەم مەنى جەتەلەپ اۋلانىڭ شەتىندە ەرتىپ كەلدى دە، سوندا بايلاۋلى تۇرعان ءبىر قويدى باسىن قۇبىلاعى قاراتىپ، ءتورت اياعىن بايلاپ جاتقىزىپ،  ماعان ارناپ باتاسىن بەرىپ، مالىن باۋىزدادى. سودان كوپ وتپەي مەن قازاقستانعا ات باسىن تىرەدىم. بۇل 1997 جىلدىڭ  سوڭى ەدى. سودان بەرى قازاقستاندا جاساپ كەلەم، قازىر وسى ەلدىڭ ازاماتىمىن. مۇندا كەلگەلى كورگەن قيىندىعىم دا از ەمەس، الايدا، جەتكەن جەتىستىگىم ونان دا مول بولدى.
ەلگە كەلگەن سوڭ ءوز وتانىمدا ءوز ءتۇتىنىمدى تۇتاتايىن دەپ، ءبىر قىزبەن كوڭىل قوسىپ جۇرگەنىمدە، ءبىر كۇنى الگى قىز وتە كوڭىلسىز كەلدى، جىلاعانى، ۇيىقتاماعانى قىزارعان، دومىققان كوزدەرىنەن كورىنىپ تۇردى. مەن ودان نە سەبەپتى وسىنداي كۇيگە تۇسكەنىن سۇرادىم. ول:
- قاستەر، كەشە ءتۇن مەن ءۇشىن سونشالىقتى اۋىر دا، ازاپتى بودى. ءبىز ەكەمىزدىڭ وتباسىن قۇرساق دەگەن ارمانىمىز ورىندالمايتىن سياقتى. سەبەبى، مەن تۇسىمدە سەنىڭ اكەڭدى كوردىم، ءوزىڭ بىلەسىڭ مەن ول كىسىنى ومىردە كورمەدىم عوي، اقسارى كىسى ەكەن، ماعان: قىزىم، مەن سەندەردىڭ ۇيلەنۋلەرىڭە قارسىمىن، سەبەبى، وكىنىشتىسى سول سەن ومىرگە بالا اكەلە المايسىڭ، ال مەنىڭ ۇلىم بالا  ءسۇيۋى ءتيىس-دەدى. قىز وسىنى ايتىپ ەگىلدى. ونىڭ سۋرەتتەگەن ادامى ءدال مەنىڭ اكەمنىڭ ءوزى ەدى. مەن نە دەرىمدى بىلمەدىم. سوڭىندا سولاي بولدى، مەن باسقا قىزبەن تاعدىر قوستىم. قازىر ۇرپاقتارىم بار، باقىتتى ءومىر ءسۇرىپ جاتىرمىن.
قۇرمەتتى وقىرمان، بۇلار مەنىڭ ءوز باسىمنان وتكەن ىستەر، شىنايى ومىردە بولعان وقيعالار. راديونىڭ ەكى تولقىنىندا ەكى ءتۇرلى حابار  نەمەسە ەكى ءتۇرلى ارنادا ەكى باسقا كورسەتىلىم ءجۇرىپ جاتقانداي ول دۇنيەدەگىلەر مەن بۇل دۇنيەدەگى بىزدەر ءبىر-ءبىرىمىزدى كورمەسەك تە، ەستىمەسەك تە، بىراق قاتار ءومىر ءسۇرىپ جاتقانىمىز دا داۋ جوق. جاراتۋشىنىڭ قۇدىرەتى سول، تەڭىز سۋلارىن دا ءبىر-بىرىنە قوسپاي، ورتالارىنا كوزگە كورىنبەس پەردە قۇرىپ، ءبىر باعىتتا اعىزىپ قويدى ەمەس پە? بىزدەر دە سول تەڭىز ىشىندەگى قوسىلماس وزەندەردەي كورىنبەس پەردەلەردىڭ اسەرىندە ءبىر-بىرىمىزگە قوسىلماي ءوز ارنامىزبەن ءجۇرىپ جاتقان سياقتىمىز. پايعامبارىمىز س.ا.ۋ . وعان اللانىڭ سالەمى مەن يگىلىگى بولسىن ايتقانداي: ادامدار ۇيقىدا، ولگەن سوڭ ويانادى-دەپ، ولگەندەر ويانعان، ال ءبىز ۇيقىلى-وياۋ جۇرگەن پەندەمىز-اۋ شاماسى، سودان بولار ولار بىزگە، جاقىندارىنا كومەكتەسىپ، جول-جورىق كورسەتىپ وتىراتىنداي. مەنىڭ كەشىرمەم ءتارىزدى جايتتەردى بۇل ومىردە تالاي ادام باسىنان كەشسە كەرەك-ءتى...
سوندا، ولگەندەر قايتىپ كەلەدى دەيسىز بە?-دەپ سۇراعىڭىز كەلەتىن شىعار.
مەنشە ولگەندەر قايتىپ كەلەدى. ولار تەك، ءبىز قينالعان، قۋانعان ساتتەردە  تۇسىمىزگە ەنۋ ارقىلى عانا "قايتىپ كەلەدى", ءسويتىپ بىزگە ايان بەرەدى، سونىسىمەن ءبىزدى قورعاپ-قورشاپ جۇرەدى. ول ءۇشىن ادامدار تىرشىلىكتە ءبىر-ءبىرىنىڭ قادىرىن ءبىلۋ كەرەك-اق. بۇل دا اللا تاعالانىڭ جەر بەتىندە ءتىرى جۇرگەن پەندەلەرىنە بولعان مەيىرىمىنىڭ ءبىر بەلگىسى بولار. بارلىعى دا قۇدىرەتى كۇشتى، اسا قامقور، ەرەكشە مەيىرىمدى اللاعا عانا ايان.
(سوڭى)
سارقىتقان قاستەر
"قامشى" سىلتەيدى


0
评论ىزدەلۋدە......
جوبا تۋرالى | اي - كۋا ۋيچات تەكشەسى | بايلانىس ورناتۋ | قولداۋشىلار | وقىرمان نازارىنا | ەرەجە - تۇزىم | لەبىز |

توراپتىڭ بارلىق ۇقىعى اي - كۋا تورابىنا ءتان.جاۋاپتى رەداكتور:مۋسا ءتابىتاي ۇلى(ءمانسۇر)

copyright 2017 苏ICP备15062819号-3 18792514428 Mr.Musa