قازىرگى ورنىڭىز:ءسوز ونەرى » تولىق مازمۇن

سوڭىنا نۇكتە قويىلعان حات (اڭگىمە)

قوسىلعان ۋاقىت:2016-12-13رەداكتور:مۋساقاينارى:اي-كۋا سايتىكورىلىمى:ىزدەلۋدە...


تاڭ راۋانداپ اتىپ كەلەدى. ءتۇنى بويى كوك اسپان تورىندە جامباستاپ جاتقان بوزامىق اي كوكجيەكتىڭ ەرنەۋىنە ءىلىندى. جۇلدىز شىققالى سۇڭقىلداعان بايعىز – مۇڭلىقتىڭ جاعى تالىپ ءۇنى وشكەن. قالانىڭ داڭعازا مۋزىكاسى دا تىنعان. اندا – ساندا اۋپىلدەگەن ءيتتىڭ داۋىسى عانا ەستىلەدى. وسىناۋ شاھاردا وياۋ وتىرعان جالعىز جان يەسى ءوزىم عانا شىعارمىن. مۇلدە ۇيقىم كەلەر ەمەس. كوزىمدى جۇمسام، كىرپىگىمە ءىلىنىپ تۇرعان قىز بەينەسى ەلەستەيدى. جان – جاعىما قارايمىن، ەشكىم جوق. كەشە پوچتا ارقىلى كەلگەن حاتتى بىرەۋ ۇرلاپ كەتەردەي باۋىرىما باسامىن، بىرەۋ ۇرلاپ كەتەدى دەپ ەمەس بالكىم، باسقا ءبىر سەزىممەن وسىلاي ىستەپ جاتقان دا شىعارمىن. ءوڭ مەن ءتۇستى اجىراتا الماس كۇيدەمىن. ورنىمنان تۇردىم دا ساندىعىمنىڭ تۇبىندە جاتقان بۇلدىرشىننەن كەلگەن حاتتاردى ۇستەلىم ۇستىنە قويدىم. كوز الدىمنان وتكەن شاقتار قايتقان قازداي تىزبەكتەلىپ ءوتىپ جاتتى. بۇلدىرشىننەن كەلگەن حاتتارعا رەت نومەرىن قويىپ وتىراتىن ادەتىمنىڭ پايداسى ءبىر ءتيدى. شەتتەرى جەمتىرلەنىپ جىرتىلا باستاعان حاتتاردى وقي باستادىم.
«سالەمەتسىز بە؟
(ول كەزدە مەنى ءسىز دەيتىن) تۋعان جەر قۇشاعىنان ءسىز ەكەۋىمىزدە الىستا ءجۇرمىز. بۇگىن ءبىز جاققا قار جاۋدى. بىراق اينالا اق قارعا ورانارى مۇمكىن ەمەس. مەنىڭ وسى جەرگە العاش تابانىم تيگەندە ويىما كەلگەنى: ەندى قايتىپ كۇندەرىمدى وتكىزەم،- دەگەن ۋايىم ەمەس، سوناۋ جىلدارى زورلىق – زومبىلىق كورىپ، قۋعىندالىپ كەلگەن بابالارمىنىڭ ارۋاعىنا دۇعا باعىشتاۋ بولدى. وزىڭىزدە بىلەسىز، وسىناۋ قۇمدى ولكە تارىمعا كىناسىز قانشا جاننىڭ قانى تامىپ، تەرى ءسىڭدى. كەلگەلى كورگەنىم، جان – جاعىمداعى مەڭىرەۋ قىزىل قۇم عانا. ءسىز اڭگىمەلەپ بەرەتىن بارحان مەن باقشاگۇلدى (ورالحان بوكەيدىڭ «قۇم مىنەزى» دەگەن شىعارماسىنىڭ كەيىپكەرلەرى) ويلادىم... بۇل ونىڭ ماعان جازعان العاشقى حاتى ەدى. دالاعا قاراسام اي الدە قاشان كوكجيەككە ءسىڭىپ كەتكەن. كۇن شىعا قويماپتى. ەكىنشى حاتىن وقي باستادىم.
«سالەمەتسىز بە؟
مەن تۋعان جەرگە كەلگەلى ءبىر اپتا بولدى. كەشە، ءسىز ەكەۋمىز سەرۋەندەپ باراتىن شاقپى وزەنىنە بارىپ قايتتىم. جالعىز باردىم... (وسى جەرىنە كوپ نۇكتە قويىلىپتى) ادەيى ءسويتتىم. ەسىمە ەڭ الدىمەن كىم تۇسەر ەكەن دەدىم. شاقپى تولقىپ اعىپ جاتىر. ەسىمە ءسىزدىڭ، مەنى العاش شاقپىعا ەرتىپ بارعان كەزدەگى، شاقپىعا وڭ جاعىنان اعىپ كەلىپ قوسىلىپ جاتقان لاي سۋدى كورىپ “ءبۇلدىرشىن، قاراشى، نە كوردىڭ? دەدىڭىز. مەن “تەك تۇنىق سۋعا قوسىلىپ جاتقان لاي سۋدى عانا كوردىم” دەپ ەدىم. سوندا ءسىز “شاقپى بورانقۇل دەگەن جايلاۋدان، قازاق دالاسىنان مولدىرەپ تازا قالپىندا اعىپ كەلەدى، ال مىنا ارادان لاي سۋ قوسىلىپ، شاقپى لايلانۋدا. ءبىزدىڭ بۇرىننان كەلە جاتقان مادەنيەتىمىز، ونەرىمىز، سالت – ءداستۇرىمىزدى ورتادان قوسىلعان لاي مادەنيەت بۇزۋدا” دەگەن ەدىڭىز...».
ول ءار جولعى حاتىنىڭ سوڭىنا جالعىز نۇكتە قويماي كوپ نۇكتە قوياتىن. بۇل ءالى تالاي حات جازام دەگەنىنىڭ بەلگىسى ەدى. ءار حاتى كەلگەن سايىن الدىمەن كوزىم سوڭىنا تۇسەتىن. ويتكەنى ول ىستىق سوزدەرىن تەك حات سوڭىنا جازاتىن - دى. وسى جولعى حاتى كەلگەندەدە الدىمەن سوڭىنا قويىلعان جالعىز نۇكتەسى ءبىر سىردى اڭعارتقانداي بولىپ ەدى. تاعى ءبىر حاتىن قولىما الدىم.
«سالەمەتسىز بە?
سىناپتاي سىرعاقتاعان دۇبىرگە تولى دۇنيەنىڭ ارمانى مەن تالعامى، باعىتى مەن باعدارى ۇقساماعان ەكى سۇردەكتىڭ جولاۋشىسى بولعان بىزدەردە قالايدا ءبىر قيماستىق پەن ساعىنىش بار. جازعان حاتىڭىزدى تاپسىرىپ الدىم. حاتىڭىزدىڭ دەمى ىستىق بولعانمەن تالابى اۋىر ەكەن. توبەمنەن جاي تۇسكەندەي بولدىم. ءارى “ماڭايىڭىزدا بىرگە جۇرگەن قالىڭ قىز قاۋىمنىڭ اراسىنان مەن قالاي ۇناپ قالدىم” دەپ تە تاڭىرقادىم. شىنىمەندە ماعان جازىلعان حات پا بۇل نە دەپ؟ جاۋاپ قايتارارىمدى بىلمەي جۇرگەندە سىزدەن تاعى ءبىر حات كەلدى. مەن سوندا بارىپ وتكەن جولعى حاتىڭىزعا جاۋاپ قايتارماعانىمدى ءبىلىدىم. رەنجىمەڭىز، وسى حاتتى دا قىسقا جازدىم. تەك ءسىز رەنجىپ ءارى الاڭداپ قالماس ءۇشىن عانا...
حاتتى كەۋدەمە باستىم. «رەنجىپ ءارى الاڭداپ قالماس ءۇشىن عانا» دەگەن سوزدەر جانىما سارى مايدى ەرىتەر كۇن شۋاقتاي جايلى ءتيدى. جاتاق ءىشى دۇرسىلدەگەن اياق دىبىسىنا تولى. كارى شاھاردىڭ ءتىرى جاندىسى تىرلىك قامىنا كىرىسكەن. مەنىڭ ساباققا دا بارعىم كەلمەدى. ءبۇلدىرشىننىڭ حاتتارىن بىرىنەن كەيىن ءبىرىن وقي بەردىم.
«سالەمەتسىڭ بە؟
(بۇل كەزدە ءسىز دەگەنى سەنگە وزگەرگەن بولاتىن) كەشە جايلاۋعا بارىپ كەلدىم. الگى ءبىر اندە ايتىلاتىن “كوزىڭنەن ءمولدىر، تورعاي دالاسىن كوردىم” دەگەن جولداردى “كوزىڭنەن ءمولدىر، تالدىنىڭ تاۋلارىن كوردىم” دەۋشى ەدىڭ عوي. جايلاۋ بۇرىنعى سەن ەكەۋمىز قىدىراتىن جايلاۋداي ەمەس، قۇشاعىن اشپايدى. بالكىم سەن جوقتىقتان شىعار. كلاستاس قىزىڭىز ۇشىپ ولگەن قارا تاس ءتىپتى سۇركەيلى. ماڭايىنداعى شىرشالار تەگىس قۋراعان. تەك سول قىزدىڭ قىزىل ورامالى ىلىنگەن جالعىز شىرشا عانا جاپ جاسىل... نەنىڭ كۇشى وسىلاي ەتىپ تۇرعانىن بىلمەدىم. بالكىم كىناسىز اققان قان قۇدىرەتى شىعار. ايداۋسايدىڭ دا قاراعايلارى سيرەگەن. ەكى تال گۇل تەردىم، بىرەۋىن ساعان بەرەم، ەكى تال راۋعاش جەدىم، بىرەۋىن سەن بوپ جەدىم. ءوزىڭ ەرتىپ بارعان بۇلدىرگەندى بەتكەيگە بارمادىم. “جىلان بارما” دەپ قورىقتىم. سەن بولساڭ قورىقپاي بارار ەدىم. اۋىل دا وزگەرىس كوپ ەكەن. وزىڭدە ەستىگەن بولارسىڭ بالكىم. دوسىڭىز سەرىك قايتىس بولپتى. قىرشىن كەتكەن دوسىڭىزدىڭ ارتى قايىرلى بولسىن. كوكتەمدە ەگىن ەگەتىن كەزدە تالدىعا اسىعىس كەتىپ بارا جاتىپ، بەيىتتىڭ تۇسىنداعى اينالمادا قارسى كەلە جاتقان ماشينانىڭ استىنا موتوسيكىلىمەن كىرىپ كەتپتى. ادام تانۋ مۇمكىن ەمەس بولپتى دەيدى ولىگىن كورگەندەر. جاستاردا وزگەرىس كوپ. اسىرەسە وزىمە كەلسەدە ايتايىن قىزدار ءبىر ءتۇرلى بوپ بارادى ەكەن. گۇلنۇر كوكتەمدە كەتكەن كۇيى اۋىلعا قايتىپ ورالماپتى. ەستىسەم ۇلتى دا ءدىنى دە باسقا بىرەۋگە تۇرمىسقا شىعىپتى. اۋىل بوپ لاعىنات ايتىپ وتىر “بەت ءجۇزىن كورمەيمىز” دەپ. انەۋ كۇنى اناسىنا جولقىتىم. بوتاداي بوزداپ وتىر. “مەنىڭ گۇناۋىم جەرگە قاراتتى” دەپ. شوشاڭداعان قىز شەشەگە ءسوز كەلتىرەر دەگەن وسى دا. توي تومالاقتا اۋىل ايەلدەرى ءسوز قىلاتىن سياقتى. بۇل جولعى حاتىم تىم مۇڭلى بوپ كەتتى بىلەم. وزىڭنەن قۋانشتى حات كۇتەم...
 ءوزىڭنىڭ ءبۇلدىشىنىڭ»جىلاعىم كەلدى. دوسىم مەن تاستان قۇلاپ ولگەن قىز ءۇشىن. مەنىڭ ەڭ العاش ولىمگە بەت كورىپ بارعانىم سول قىزدىڭ ءولىمى بولاتىن. اعام ەكەۋمىز ءشوپ شاۋىپ جاتقامىز. كورشى ۇيدەگى جىگىت كەلدى. ءوڭى قۋقىل تارتىپ تۇر. ءجونسال سالەمدەستى. قاتتى جىلاعانى كوزىنەن ءبىلىنىپ تۇر. “نە بولدى؟ ءجۇزىڭ سىنىق قوي؟!” دەپ ەدى اعام، اۋىزى ارەڭ سوزگە كەلدى. “تۇنىق تاستان ۇشىپ قايتىس بولىپتى كەشە. سۇيەگىن الىپ كەلەدى ەكەن. سوعان بارايىن دەسەم كولىك جوق. موتوسيكىلىڭىزدى بەرە تۇرساڭىز”. اعام سىلەيدى دە قالدى. ەندى عانا ون جەتىگە ىلىنگەن قىزدىڭ ءولىمى وڭاي ءتيسىن بە. ەكى سوزگە كەلمەدى. “ال، ال” دەپ عانا ايتتى. ءبىر ايدىڭ الدىندا عانا جازعى كانيكۋلعا تاراعاندا “جايلاۋعا باراسىڭ  عوي، ۇيگە بار، مەن سەنتيابىردە بىراق كەلەم” دەپ كەتكەن قىزدىڭ ءولى دەنەسى كەلەدى دەپ كىم ويلاعان. ماسكۇنەم اكەمەن تاس باۋىر اعانىڭ جابىرىنە شىداماي تاستان قۇلاپ قايتىس بولعان قىز، كورشى ۇيدەگى جىگىتتىڭ ۋادەلەسكەن بولاشاق جارى ەكەنىن كەيىن بىلگەم. دوسىمنىڭ دا ءولىمىن ەستىپ العام.  مەن ءارجولى اۋىلعا بارعان سايىن “ءاي، بۇيرا باس، سەن بارىمىزدەن استىڭ عوي. كلاستاعى تىنىمسىزدىڭ ءبىرى بولساڭ دا، ايتەۋ وقىپ ءجۇرسىڭ. ءبىز بولساق سول اق تاياق پەن تەمىر كۇرەك قولدا. كۇن شىققاننان باتقانعا دەيىن تىربىنامىز. ءيا بۇتىندەلىپ جاتقان جىرتىعىمىز جوق. كەتەۋى كەتكەن دۇنيەنى جوندەپ بولمايسىڭ.”,- دەپ كەپ قۇشاعىنا قىساتىن. ولەرىنەن ءۇش ءتورت اي بۇرىن اۋىلعا بارعانىمدا ۇيىنە شاقىردى. “قاربالاسپىن. ەندى ءبىر كەلگەندە بارايىن” دەپ ەم بولمادى. “سەن نە مەنى بويىڭا توعىتپاي تۇرسىڭ با؟ الدە قولاڭ شاشتىلەردەن قولىڭ بوساماي جۇرمە؟ بۇگىن ءبىزدىڭ ۇيگە قوناق بول. سەن جىل قۇسى قۇساپ ەندى ءبىر اينالىپ كەلگەنشە مەن بارمىن با جوقپىن با كىم بىلەدى؟”,- دەگەن. ويىمدا ەشتەڭە جوق “وسى ۋاققا دەيىن جىگتتى قىز الىپ قاشىپ كەتىپتى دەگەندى ەستىگەم جوق، سەنى اجال كەپ اكەتپەسە”,- دەدىم. وسى سوزىمە كۇنى بۇگىنگە دەيىن وكىنەم، ءارى قيىلا جابىسسا دا سول كۇنى ونىڭ ۇيىنە بارا الماپ ەدىم. سودان كەيىن جولىعا المادىم. قىز ەمەس اجال كەپ الىپ كەتىپتى. قىستا ۇيىنە باردىم. ءبىر اكەدەن ەكى ۇل ەدى. سەرىك ۇلكەنى بولاتىن. كىشىسى ەرىكتى دە كۇزدە تويمسىز قارا جەر جالماپتى. ەكى بىردەي ۇلىنان ايىرلىعان كەيۋانا قايعىدان شوگىپ شۇيكەدەي كەمپىرگە اينالىپتى ءبىر – اق  جىلدا. مەنى كوردى دە بوزدادى – اۋ . سولقىلداپ تۇرعانى بولماسا كوزىنەن ءبىر تامشى جاس شىعار ەمەس، قوس جاناردىڭ جاسى باياعىدا تارتىلىپ بولعان ەكەن.
تۇسكى مەزگىل بولايىن دەدى.  بىرەسە حات وقىپ، بىرەسە وتكەن شاقتى قيالداپ ءالى وتىرمىن. جاتاق ءىشى شۋىل، بىراق مويىن بۇرار ەمەسپىن. تاعى ءبىر حاتىن وقي باستادىم. بۇل ءتىپتى وقي - وقي، توقىمداي توزعان حات ەدى.
«سالەمەتسىڭ بە؟
حاتىڭدى الىپ ايىرقشا قۋاندىم. مەندە ساعىنىپ ءجۇرمىن. قازىر ءتۇن ورتاسى بولدى، ۇيىقتاي الماي جاتىرمىن. سەنى ويلاپ سابانداي سارعايىپ كەتەتىن ءتارىزدىمىن. مەن سەنى شەكسىز سۇيەم. بىراق ەكەۋمىزدىڭ قوسىلۋىمىزعا بوگەت كوپ. اناما شەت جاعاسىن شىعارىپ ايتسام، قولىن توبەسىنە قويىپ قارسى بولدى. “سەنى سوناۋ يت ارقاسى الماتىعا ەمەس، مىناۋ تارىمعا وقۋعا كەتكەنىڭە ارەڭ شىداعام. اق ءسۇتىمدى اقتايىم دەسەڭ وسى جاقتان جىگىت تاپ، اكەڭ مەن مەنى ويلاما، انا جارىم ەستى باۋىرىڭا ءبىز ولگەن سوڭ قارايلاساتىن ادام كەرەك. ونىڭ ومىرگە ءويتىپ كەلگەنىنە سەن دە، مەن دە، اكەڭ دە كىنالى ەمەس. بىراق قاراۋسىز قالدىرساق ول اۋىر كۇنا. كوزىم جۇمىلعانشا الپەشتەپ قارايمىن. ىشىمە سيعان بالام سىرتىما دا سيادى. ال كوزىم جۇمىلاردا ساعان اماناتتاپ كەتەم. سەن شەكارادان شەتكە كەتسەڭ وندا انا باۋىرىڭدى كورگە كومىپ بارىپ كەت”,- دەيدى. ەكى وتتىڭ ورتاسىندا قالدىم. انامدى ويلاسام سەنى قيمايىم، ءوزىم اڭساپ تاپقان ماحابباتتى ءوزىم ولتىرگىم كەلمەيدى. ال ءبىر ويلاسام انامدىكى دە دۇرىس. جالعىز باۋىرىمنىڭ جايى وزىڭە دە بەلگىلى. ساعان “مەن ءۇشىن بۇل جاققا كەل” دەپ ءتىپتى ايتپايمىن. ويتكەنى سەن سولاي كەتەم دەپ قانشاما بوداۋ بەردىڭ. ءتىپتى وقۋىڭدى دا تاستاپ كەتتىڭ. ء“بىر قىز ءۇشىن كەلىپ الىپتى” دەگەن اتتى سەندە كوتەرىپ جۇرە المايسىڭ ءارى ونداي مازاققا سەنى قالدىرعىم كەلمەيدى. باۋىرىمدى ولاي الىپ بارۋ ءتىپتى مۇمكىن ەمەس. انامنىڭ ويى اۋىلداعى ءوز ناعاشى اپايىنىڭ ۇلىنا بەرگىسى كەلەدى. تەك سونىمەن تۇرمىس قۇرسام عانا باتاسىن بەرەتىن ءتۇرى بار. “سول عانا ساعان دا، انا باۋىرىڭا دا سۇيەنىش بولادى” دەيدى. انام مەنى ەمەس جالعىز ۇلىن ويلاپ وتىر. بۇل ساعان ايىرلىسايىق دەگەنىم ەمەس، از بولسادا مۇڭىمدى ساعان ايتىپ جەڭىلدەگىم كەلگەنى...
 وزىڭنىڭ ءبۇلدىرشىنىڭ»بۇل ونىڭ وقۋىن ءبىتىرىپ كەلە سالعانداعى جازعان حاتى ەدى. كوزىمە جاس تىعىلدى. ونىمەن بىرگە وتكەن شاقتارىم كينو لەنتاسىنداي كوز الدىمنان جىلجىپ ءوتىپ جاتىر.
 بىردە ول ەكەۋمىز كوشەدە قولداسىپ كەلە جاتقامىز. وڭ قولىمدى ۇستاپ كەلە جاتىپ “مىنا ورتان تەرەك ساۋساعىڭ نەگە قيسىق” دەپ تاڭ-تاماشا بولدى. “تۋا سولاي” دەپ ازىلگە بۇردىم. “ايىت جاسىرماي، ايتپەسە وكپەلەيىم” دەپ بۇرتيا قالدى. ونىڭ وكپەلەگەنى دە ادەمى بولاتىن. بەتىندەگى ادەمى شۇڭقىلى تىپتىدە سۇلۋلاندىرىپ جىبەرەتىن. “سەنى كلاستاستارىڭ قيىن تىنىمسىز دەيدى. ساۋساعىڭدى سول تىنىمسىزدىقتان قۇرتپادىڭ با؟”,- دەپ مەيىر توگە سۇرادى. شىنىمدى ايتتىم. “كوكپار تارتىپ ءجۇرىپ، شىعارىپ العام. ۇيگە ايتايىن دەسەم ۇرساتىن بولدى ءارى وزىمدە شىعىپ كەتتى دەپ ويلاماعام. ءبىر كۇنى سەن سياقتى،  انام دا ۇستاپ وتىرىپ كورىپ قويىپ سۇرادى. سودان كوكپاردا قۇرىعانىن ايتىپ ەدىم، اۋىلداعى سىنىقشى كىسىگە كورسەتتى. ول كىسى بۇل ساۋساق شىعىپ ۋاعىندا سالىنباعاندىقتان بۋىنى شور بوپ قالعان. ەشكىنىنڭ مايىن تارتىپ جۇمسارتىپ بارىپ سالماسا بولمايدى دەدى. سودان ەشكىنىڭ مايىن تارتىپ بارىپ سىنقشى سالىپ بەرگەنى وسى، از بولسادا تۇزۋلەندى. ايتپەسە ساعان قولى جەتپەگەن جىگىتتەر مەنىڭ ساۋساعىمدى كورىپ:
“بارەكەلدى ءبۇلدىرشىن تاپقانىڭا،
قيسىق ساۋساق ءتۇسىپتى قاقپانىڭا”,- دەپ كەلەكە ەتەر ەدى» دەپ قالجىڭعا بۇرعام. ول “ەل سوزىندە نەم بار، ساۋساعى قيسىق بولعانمەن نيەتى ءتۇزۋ دەر ەدىم” دەپ ايالى الاقانىمەن ۋقالاپ، اقىرىن ءسۇيىپ قويعان. سول قيسىق ساۋساعىم ءدىر – ءدىر ەتەدى. قولىمداعى حات سۋسىپ جەرگە ءتۇسىپ كەتتى.
ەڭ سوڭعى حاتىن قولىما قايتا الدىم. تۇنىمەن سان قايتارا وقىعام. كوزىم سوڭىنداعى جاپان تۇزدەگى جالعىز جولاۋشىداي بولىپ كورىنگەن جالعىز نۇكتەگە ءتۇستى.
«سالەمەتسىڭ بە؟
اق ۇرپەك ارمانىمنىڭ ءلالا گ ۇلى قوش بول. مەن باۋىرىمدى قيا المادىم. وعان “سەنى تاستاپ ەشقايدا كەتپەيىم دەپ” ۋادە بەردىم. ءوز ايتقانىنان ءونىم بولماسىن بىلگەن انام  باۋىرىما ايتقىزدى. “مەنى تاستاپ قايدا كەتكەلى ءجۇرسىڭ؟ اپام سەنى الىسقا، ەكەۋمىز جەتە المايتىن شالعايعا كەتكەلى ءجۇر دەپ ايتتى.”,- دەپ بوتاداي بوزدادى. وزىنە سۇيەنىش كەرەك ەكەنىن ابدەن بىلەتىن سياقتى. كوز جاسىن ايادىم. ءارى انام مەن باۋىرىمدى زار ەڭىرەتكىم كەلمەدى. سەن دە ەت جۇرەكتى پەندەسىڭ عوي. مەنىڭ ورىنىمدا بولساڭ ءوزىڭ دە وسىلاي ىستەر ەدىڭ. باۋىرىما “سەنى تاستاپ ەشقايدا كەتپەيىم” دەپ ەدىم بالاشا قۋاندى. اناما ء“بۇبىش ءبىزدى تاستاپ كەتپەيىم دەدى” دەپ ايعايلاپ ءماز بولدى. انام كوز جاسىن كولدەتىپ كەپ “قىزىم مەنى كەشىر، ىستەگەنىمنىڭ قاتە ەكەنىن بىلەم. بىراق مىنا ۇلعا سۇيەۋ كەرەك، سەنەن باسقا كىمى بار بۇل ومىردە”,- دەپ قۇشاقتاپ وكسىدى. ەكەۋىن اڭىراتىپ كەتكەندە مەن نە باقىت تابا قويام تىرلىكتەن. مەنى وپاسىز سانارسىڭ بالكىم. بىراق مەنىڭ ورىنىما ءوزىڭدى ءبىر مينۋت قويىپ تۇرىپ، ادامي قاسيەتپەن ويلانىپ كورسەڭ، سوندا عانا مەنى كىنالاماسسىڭ. اناما ۋادەمدى بەردىم. جاقىندا قۇدا تۇسەدى. سەنى شىن ءسۇيدىم، بىراق الدى كەڭ، ارتى تار الدامشى ومىرگە نە دەيىن؟ باقىت تىلەيىم ساعان. دەنساۋلىعىڭا كوڭىل ءبول. سەنەن سۇرار جالعىز تىلەگىم: مەنى شىن سۇيگەن بولساڭ، وسى ۋاققا دەيىن الداپ كەلمەگەن بولساڭ، وسى حات قولىڭا تيگەن سوڭ قايتارىپ حات جاز با.»
حات سوڭىنا قويىلعان جالعىز نۇكتە الدىمدى توسقان جالاما قۇزداي بولىپ سەزىلدى. قالامىمدى قولىما الدىم. بىراق، بۇلدىرشىنگە حات جازۋ ءۇشىن ەمەس، قويىن داپتەرىمە ءوز كوڭىل – كۇيىمدى جازۋ ءۇشىن.
قۋانالى الماسبەك ۇلى


0
评论ىزدەلۋدە......
جوبا تۋرالى | اي - كۋا ۋيچات تەكشەسى | بايلانىس ورناتۋ | قولداۋشىلار | وقىرمان نازارىنا | ەرەجە - تۇزىم | لەبىز |

توراپتىڭ بارلىق ۇقىعى اي - كۋا تورابىنا ءتان.جاۋاپتى رەداكتور:مۋسا ءتابىتاي ۇلى(ءمانسۇر)

copyright 2017 苏ICP备15062819号-3 18792514428 Mr.Musa